"Quandu ti senti i nerbi pizziàti e ccerchi un pocu i paci peri peri; Quandu tutti ti pigghinu a ppuntàti parenti, amici e ppuru to’ muggheri; quandu cerchi ‘na stampicceddha i luci ammenz’o scuru chi tti struggi ‘u cori, cerchi n’aiutu ma non trovi ‘a vuci i nuddhu mi ti rici ddu’ palori… Allura, sent’a mmia, va’ ‘nti to’ mamma ch’è sempri pronta mi ti rici: “figghiu” cu’ ddha’ vuci ch’è cadda com’a fiamma. Va’ ‘nti to’ mamma, senti ‘u me’ cunsigghio! … Iddha ti ‘mbrazza e, ssi tu sta ciangendu, ti stuia l’occhi cu’ so’ muccatùri… To’ mamma, puru quandu sta’ murendu, i spindissi pi ttia l’urtimi uri! … Quandu ti senti ammenz’o mari ‘u cori iddha è ‘a barca chi tti porta ‘a rriva, va’ ‘nti to’ mamma, pigghia i me’ palori, comu faciva ieu… quandu ll’aviva"! di Giuseppe Ginestra
Commenti
Posta un commento